ღორის ხორცის რულეტი სატაცურით
ძალიან გემრიელი ღორის ხორცის რულეტი სატაცურით და ყველით – დაბალკალორიული, აგლუტენური და დაბალნახშირწყლოვანი კერძი. თუ ნაკლებცხიმიან ყველს გამოიყენებთ, კერძის კალორიულობას შეამცირებთ. მოამზადეთ აუცილებლად, ძალიან მოგეწონებათ.
მასალა:
- 4 ცალი ღორის ხორცის თხელი, ფართო ნაჭერი
- 4 სკ კრემყველი (დაახლოებით)
- 1 თავი ხახვი
- 1-2 კბილი ნიორი
- ცოტაოდენი ქინძი
- მარილი და პილპილი
- 1-2 კვერცხი
- 200 მლ რძე ან ნაღები
- 100-150 გ გახეხილი ყველი
- ზეთი შესაწვავად
- 500 გ მწვანე სატაცური
მომზადება:
სატაცურს გადააჭერით ძირები დაახლოებით 2 სმ-ის სიგრძეზე. თუ სქელი კანი აქვს, ღერების ქვედა ნაწილი გაფცქვენით. მოხარშეთ ადუღებულ და დამარილებულ წყალში 5 წუთის განმავლობაში, გადაწურეთ, ცივი წყალი გადაავლეთ და საწურზე დაწურეთ.
ხორცი გარეცხეთ და შეაშრეთ, დაბეგვეთ და ორივე მხრიდან მოაყარეთ მარილი და პილპილი. ერთი მხრიდან გადაუსვით კრემყველი, ცოტაოდენი გაჭყლეტილი ნიორი, მოაფრქვიეთ დაჭრილი ქინძი, ხახვი და პილპილი, გადაახვიეთ რულეტად და დაამაგრეთ მეტალის ან ხის ჩხირით.
რულეტები შეწვით ზეთში ყველა მხრიდან. ძალიან ნუ გამოაშრობთ.
კვერცხი გათქვიფეთ რძესთან (ან ნაღებთან) ერთად და შეკმაზეთ მარილით და პილპილით.
ცეცხლგამძლე ფორმაში ჩააწყვეთ შებრაწული რულეტები. სატაცური რულეტებს შორის და ირგვლივ გადაანაწილეთ, მოასხით კვერცხის და რძის ნარევი და მოაყარეთ გახეხილი ყველი.
ყალიბი შედგით წინასწარ 200 გრადუსზე გახურებულ ღუმელში და აცხვეთ, ვიდრე ზედაპირი არ შეიფერება.
ღორის ხორცის რულეტი სატაცურით სუფრასთან ცხელი მიიტანეთ ყალიბითვე, მოაფრქვიეთ დაჭრილი ქინძი.
მიირთვით გემრიელად!