გამომცხვარი სოკო ყაბაყის და სტაფილოს შიგთავსით
გემრიელი და ვიტამინებით მდიდარი ვეგეტარიანული კერძი – გამომცხვარი სოკო ყაბაყის და სტაფილოს შიგთავსით. ვეგანებმა და მარხულებმა ყველის გარეშე მიირთვან. მოამზადეთ და შთაბეჭდილებები გაგვიზიარეთ 
მასალა:
- 8 ცალი დიდი ქამა სოკო (დაახლოებით)
- 2 ყაბაყი
- 2 საშუალო ზომის სტაფილო
- 1-2 კბილი ნიორი
- 1 ხახვი
- რამოდენიმე ღერი ქინძი და ოხრახუში
- ზეთი
- 200 გ ყველი (დაახლოებით), იხმარეთ ყველის სახეობა, რომელიც კარგად დნება
- პილპილი და მარილი
მომზადება:
მოამზადეთ ყაბაყის და სტაფილოს ცხელი სალათი, როგორც რეცეპტშია აღწერილი.
ყველი გახეხეთ სახეხზე, ან ხელით აზილეთ.
ღუმელი გაახურეთ 200 გრადუსზე. თუნუქის ფურცელზე დაფინეთ ქაღალდი.
სოკოს წყალი გადაავლეთ, გაფცქვენით და ფეხები მოაცალეთ. შიდა ზედაპირზე მოაფრქვიეთ მარილი და პილპილი, ამოავსეთ ბოსტნეულით, ზევიდან დაადეთ ყველის ფენა, ოდნავ დატკეპნეთ და გამოაცხვეთ გახურებულ ღუმელში.
ყველი რომ შეიბრაწება და დადნება და სოკოც დარბილდება, კერძი მზადაა.
გამომცხვარი სოკო ყაბაყის და სტაფილოს შიგთავსით სუფრასთან ღუმელიდან გამოღებისთანავე მიიტანეთ. უკეთესია ეს კერძი ისეთ ფორმაში მოამზადოთ, რითაც სუფრასთან მიიტანთ.
მიირთვით ხორცეულთან, ბრინჯის ან მაკარონის კერძებთან. ძალიან გემრიელია ცალკეც.
გემრიელად მიირთვით!
