ბატატის და ხორცის გრატანი
ბატატის და ხორცის გრატანი უგემრიელესი კერძია, რომელიც ღუმელში მზადდება. არაჩვეულებრივი არომატი აქვს, აუცილებლად უნდა სინჯოთ! 
კერძი დასაშვებია დაბალნახშირწყლოვანი და აგლუტენური კვების დროს.
მასალა:
- 1 კგ ხორცი (ფრინველის ან ღორის რბილი ნაჭერი)
- 2 თავი ხახვი
- 3 კბილი ნიორი
- 200 გ ქამა სოკო
- 1 დიდი ბატატი
- 200 გ კრემყველი
- 200 გ ყველი (სულგუნი/მოცარელა…)
- ცოტაოდენი ზეითუნის ზეთი
- მარილი, ქარი (Curry), წიწაკის ფანტელი, ხმელი ქინძი
- ქინძის პატარა კონა
მომზადება:
ხორცი დაჭერით პატარა კუბებად, ხახვი – მსხვილ ზოლებად, ნიორი – წვრილად.
ეს ყველაფერი მოათავსეთ ტაფაზე და ზეთში ჩაშუშეთ დაჭრილ სოკოსთან ერთად. შეკმაზეთ მარილით, წიწაკით, ქარით და ქინძის თესლით. გადაიტანეთ ცეცხლგამძლე ფორმაში, ზედაპირზე თანაბრად წააცხეთ კრემყველი და მოაფრქვიეთ დაჭრილი ქინძი.
ბატატი გარეცხეთ, გათალეთ, სიგრძივად გაანახევრეთ და თხელ ფენებად დაჭერით. ამ ფენებით მოფინეთ ხორცის ზედაპირი, ისე, რომ ნაჭრებმა ნაწილობრივ გადაფარონ ერთმანეთი. მოაფრქვიეთ წიწაკა და ქარი და შედგით წინასწარ გაცხელებულ ღუმელში 20 წუთით.
შემდეგ გამოიღეთ ღუმლიდან, მოაყარეთ ყველი და 10-15 წუთით შეაბრუნეთ ღუმელში.
ყველი რომ ფერს შეიცვლის და გემრიელად დაიბრაწება, კერძი მზად არის.
ბატატის და ხორცის გრატანი სუფრასთან ფორმითვე მიიტანეთ და ცხელი მიირთვით.
გემრიელად მიირთვით!
