ინდაურის ტაფამწვარი კვერცხით
ინდაურის ტაფამწვარი კვერცხით გახლავთ ცილით მდიდარი, აგლუტენური, ულაქტოზო, დაბალნახშირწყლოვანი კერძი. მარტივი და ძალიან გემრიელი სადილი ან ვახშამი. ეს კერძი ჩემმა შვილმა ნატალიმ და ჩემმა მეუღლემ მოამზადეს გამაყრუებელი მუსიკის თანხლებით 
. მე ფოტოგრაფის და დეგუსტატორის როლი შევასრულე. 
მასალა 4-5 ულუფისათვის:
- 500 გ (დაახლოებით) ინდაურის მკერდის ფილე
- 1-2 თავი ხახვი
- 2 კბილი ნიორი
- 1 კგ ქამა სოკო
- 4-5 კვერცხი
- პილპილი და მარილი გემოვნოვნებით
- ცოტაოდენი ბაზილიკი
- ზეთი შესაწველად
მომზადება:
სოკო ქაღალდის ხელსახოცით გაასუფთავეთ ან გაფცქვენით, ფეხი რამოდენიმე მილიმეტრზე გადაჭერით და მსხვილ ნაჭრებად დაჭერით.
ინდაურის ხორცი გარეცხეთ, შეაშრეთ და პატარა კუბებად დაჭერით. ტაფაზე დაასხით ცოტა ზეთი და ზომიერ ცეცხლზე მსუბუქად შებრაწეთ. მოაფრქვიეთ მარილი და პილპილი.
მეორე ტაფაზე წვრილად დაჭრილი ხახვი და ნიორი მსუბუქად მოშუშეთ, სოკო ჩაამატეთ და ზომიერ ცეცხლზე გააგრძელეთ მოშუშვა. სოკო რომ მორბილდება, მარილი და პილპილი მოაფრქვიეთ, შემწვარ ხორცს დაამატეთ და კარგად აურიეთ ერთმანეთში. გემო გასინჯეთ და თუ რამე აკლია, დაუმატეთ.
მოპირკეთებულ ტაფაზე გააცხელეთ ზეთი, ჩაახალეთ კვერცხები, დაახურეთ მინის სახურავი და ნელ ცეცხლზე დატოვეთ, ვიდრე გულებზე გადაკრული ცილის ფენა შეთეთრებას დაიწყებს. გული თხევადი უნდა დარჩეს. მოაყარეთ მარილი და პილპილი.
ბოლოს ინდაურის ტაფამწვარი თეფშებზე გაანაწილეთ: ჯერ სოკოსა და ხორცის ნარევი და ზევიდან დაადეთ შემწვარი კვერცხი. მოაფრქვიეთ დაჭრილი როზმარინი და ცხელი მიიტანეთ სუფრასთან.
მიირთვით გემრიელად!
