ატმის ჯემი
ატამი არომატული და ინტენსიური სურნელის ხილია და მისი მურაბაც და ჯემიც ძალიან გემრიელია. ამჯერად ატმის ჯემს წარმოგიდგენთ.
გირჩევთ შაქრის რაოდენობა თვითონ განსაზღვროთ ხილის სიმწიფეზე დამოკიდებულებით. ზედმეტი შაქარი ნიღბავს ხილის არომატს და კალორიულობას მატებს ჯემს.
თუ ჯემისათვის მკვრივ ნაყოფებს შეარჩევთ და ხარშვისას ფრთხილად მოურევთ, ჯემში ხილის პატარა ნაწილები შენარჩუნდება, რაც არაჩვეულებრივ ხიბლს აძლევს ჯემს.
გარწმუნებთ, ატმის ჯემი დაამშვენებს თქვენი საუზმის სუფრას, ძალიან უხდება სრულმარცვლოვან პურს, აგრეთვე კარგად გამოიყენებთ ცხობისას, მაგალითად: რულეტების შიგთავსისათვის ან მაფინების მოსართავად ან თქვენი ფანტაზიის მიხედვით.
მთავარი ისაა, რომ ძალიან ადვილად მზადდება, სცადეთ აუცილებლად.
მასალა:
- 3 კგ ატამი, კურკის გარეშე
- 1 კგ შაქარი (დაახლოებით)
მომზადება:
გარეცხილი, გაუფცქვნელი ატამი დაჭერით, ჩაყარეთ ქვაბში შაქართან მონაცვლეობით და დატოვეთ რამოდენიმე საათი, ვიდრე წვენი არ გამოეყოფა.
დადგით ნელ ცეცხლზე, წვენს რომ მოიგდებს, შეგიძლიათ ცეცხლს ცოტა მოუმატოთ. გააგრძელეთ ხარშვა სასურველ სისქემდე და კონსისტენციამდე. ხარშვისას პერიოდულად მოურიეთ.
ჯემი „დაასვენეთ“ ღამით, რომ ხილმა შაქარი შეიწოვოს.
მეორე დღეს ცივი ჯემის გემო გასინჯეთ, თუ შაქარი აკლია, დაამატეთ გემოვნებით და კიდევ წამოადუღეთ. თუ სურვილი გაქვთ, შეგიძლიათ ჯემი მსუბუქად „დააბლენდეროთ“, მე მომწონს, როცა ჯემში ხილის პატარა ნაჭრებია შემორჩენილი დაამიტომ არ ვთქვეფ.
ცხელი ჯემი ჩაასხით ცხელ ქილებში და მოახრახნეთ ცხელი ხუფები. შეინახეთ გრილ ადგილას.
მიირთვით ზამთარში გემრიელად! 
P.S. ამ რეცეპტით შეგიძლიათ ვაშლატამას ჯემიც მოხარშოთ.
