ყველის ტორტი მოცვით (Cheesecake)
ადვილად მოსამზადებელი ყველის ტორტი მოცვით (Cheesecake) ცხობის გარეშე. შეგიძლიათ გაყინული მოცვითაც მოამზადოთ. თუ გაყინული ხილით მოამზადებთ, წინასწარ დაადნეთ და წვენი ჟელატინის დასალბობად გამოიყენეთ. მოცვი შეგიძლიათ სხვა კენკროვანებითაც შეცვალოთ ან კენკროვანების ნარევი გამოიყენოთ. ძალიან გემრიელია, მოამზადეთ და აზრი გაგვიზიარეთ.
მასალა:
- 150-200 გ ხრამუნები (“პეჩენია”), მაგ. სრულმარცვლოვანი ფქვილის
- 100 გ კარაქი
- 500 გ კრემ ყველი
- 250 გ მაწონი ან ნატურალური იოგურტი
- 2 შეკვრა დაფქული ჟელატინი (თითო 9 გრამიანი) და 200 მლ წყალი
- 100 გ შაქარი
- 100 გ მოცვი
- 50 გ თეთრი შოკოლადი
- 20 გ ნაღები
- დამატებით მოცვი მოსართავად (სურვილით)
მომზადება:
26 სმ დიამეტრიან ფორმაში, რომელსაც გვერდები ეხსნება, ჩაფინეთ ქაღალდი.
ხრამუნები ცომის გასაბრტყელებელი ჯოხით ან ბლენდერში წმინდად დაფხვენით, შეურიეთ დარბილებული კარაქი, ქაღალდჩაფენილი ფორმის ფსკერზე თანაბრად გაანაწილეთ და კარგად დატკეპნეთ.
ყველი, იოგურტი და შაქარი მექსერით ათქვიფეთ. ჟელატინს დაასხით წყალი ან, გაყინული ხილის შემთხვევაში, წვენის და წყლის ნარევი. 10 წუთი დაალბეთ და შემდეგ მიკროტალღოვან ღუმელში რამოდენიმე წუთი შეათბეთ ჟელატინის გახსნამდე.
ჟელატინი შეურიეთ ათქვეფილ ყველს და დაამატეთ გარეცხილი და მშრალი მოცვი.
ყველის მასა მომზადებულ ფორმაში ჩაასხით, ზედაპირი გადაასწორეთ და მინიმუმ 4 საათით მაცივარში შედგით.
დატეხილ თეთრ შოკოლადს მოასხით ნაღები და მიკროტალღოვან ღუმელში შედგით შოკოლადის დადნიბამდე, კარგად აურიეთ, შეაგრილეთ და გაცივებული ტორტის ზედაპირზე თანაბრად გადაანაწილეთ. მორთეთ მოცვის ნაყოფებით.
სუფრასთან მაცივრიდან გამოღებისთანავე მიიტანეთ.
მიირთვით გემრიელად! 
