ღუმელში გამომცხვარი ბროკოლი ლორით
ბროკოლი სასარგებლო მცენარეა, რომელიც მდიდარია კალიუმით, კალციუმით, ფოსფორით, რკინით, ასევე B1, B2, B6, E და C ვიტამინებით და კაროტინით. 100 გ უმი ბროკოლი შეიცავს 34 კილოკალორიას. ბროკოლის შესახებ დამატებით შეგიძლიათ აქ წაიკითხოთ.
ღუმელში გამომცხვარი ბროკოლი ვიტამინებით მდიდარი, დაბალკალორიული და გემრიელი კერძია, რომელიც შეგიძლიათ გარნირად, „სტარტერად“, ან ვახშმად მიირთვათ.
მასალა:
- 500 გ ბროკოლი,
- 2 კვერცხი,
- 1 პატარა თავი ხახვი,
- 1 ცალი წითელი ბულგარული წიწაკა,
- 200 გ უცხიმო ლორი,
- 100 მლ რძე,
- 100 მლ ნაღები,
- 200 გ ყველი (სულგუნი, ან სხვა),
- პილპილი, მარილი, ქინძი, ოხრახუში
მომზადება:
გარეცხილი ბროკოლი დაყავით “ყვავილებად” და დაახლოებით 5 წუთი ხარშეთ მარილიან წყალში. წყალი გადაწურეთ და ბროკოლი გადაანაწილეთ ცეცხლგამძლე ფორმაში. ისეთი ფორმა ამოარჩიეთ, რითიც კერძს სუფრაზე მიიტანთ. ბროკოლის მოაყარეთ დაჭრილი ხახვი, კუბებად დაჭრილი ბულგარული წიწაკა და ლორი.
კვერცხები ათქიფეთ, შეურიეთ რძე და ნაღები, შეკმაზეთ მარილით და პილპილით და მოასხით ბროკოლის მასას. ზევიდან მოაფრქვიეთ გახეხილი ყველი და შედგით 180 გრადუსზე გახურებულ ღუმელში.
როცა ყველი დადნება და ზედაპირი მოებრაწება, კერძი მზად არის! 
სუფრასთან მიტანის წინ მოაყარეთ დაჭრილი მწვანილი.
მიირთვით გემრიელად ხორცეულთან ერთად, ან ცალკე! 
