ლობიოს ღვეზელი
ლობიოს ღვეზელი საფუარიანი ცომით – ადვილად მოსამზადებელი და ძალიან გემრიელი კერძია. შეგიძლიათ სადღესასწაულო სუფრისათვის, ან ოჯახური სადილისათვის მოამზადოთ. დასაშვებია ვეგანებისა და მომარხულებისათვის.
მასალა:
ცომი:
- 1 კგ ფქვილი
- 3 ჩკ მშრალი საფუარი
- 4 სკ მცენარეული ზეთი
- 2 ჩკ მარილი
- 1 სკ შაქარი
- დაახლოებით 600-700 მლ სითხე (წყალი ან რძე და წყალი შერეული)
ლობიო:
- 1 გკ ხმელი ლობიო ან ლობიოს კონსერვი
- 3 თავი ხახვი
- 4 კბილი ნიორი
- 2-3 სკ ზეთი
- მარილი, წიწაკა, ქონდარი, ქინძის თესლი და ნედლი ქინძი გემოვნებით (უხვად)
მომზადება:
მოხარშეთ ლობიო, ნახარში გადაწურეთ და ნაწილი შეინახეთ.
წვრილად დაჭრილი ხახვი და ნიორი ზეთში მოხრაკეთ და დაამატეთ ლობიოს. დაამატეთ აგრეთვე მარილი და სუნელები გემოვნებით და ბლენდერით დააქუცმაცეთ ან დაჭყლიტეთ. ლობიოს უნდა ჰქონდეს ფაფის კონსისტენცია. სისქე ცვალეთ შენახული ნახარშით.
თუ კონსერვს გამოიყენებთ, ქილის შიგთავსი ჩაასხით ქვაბში და აადუღეთ. გასინჯეთ ლობიოს მარცვლები. თუ კარგადაა მოხარშული, გააგრძელეთ მომზადება ისე, როგორც ზევით არის აღწერილი, თუ ხარშვა აკლია, გააგრძელეთ ხარშვა, ვიდრე მზად არ იქნება.
ცომი მოამზადეთ ხაჭაპურის რეცეპტის მიხედვით.
ცომი რომ ამოფუვდება, კიდევ ერთხელ ჩაზილეთ.
ღუმელი 220 გრადუსზე გაახურეთ.
საცხობ ფურცელზე ქაღალდი დაფინეთ. ცომის 2/3 ზედვე გააბრტყელეთ და ლობიოს შიგთავსი თანაბრად გადაანაწილეთ.
დარჩენილი ცომი გააბრტყელეთ საცხობი ფურცლის ზომაზე, გადააფარეთ ლობიოს და ცომის კიდეები ფქვილიანი ხელით შეაწებეთ.
ზედაპირზე დანით ჭრილები გააკეთეთ და 200 გრადუსზე გამოაცხვეთ. ღვეზელი ოქროსფერს რომ მიიღებს, მზადაა.
ლობიოს ღვეზელი სუფრასთან ცხელი მიიტანეთ.
უხდება კიტრის ან სხვა მწნილეული.
მიირთვით გემრიელად! 
