ბრიუსელის კომბოსტოს და ყაბაყის სალათი
ვეგეტარული, ვიტამინებით მდიდარი თბილი სალათი ბრიუსელის კომბოსტოთი და ყაბაყით. მარხულებს და ვეგანებს შეუძლიათ ნაღების გარეშე მოამზადონ. ძალიან გემრიელი და მარტივი კერძია. არ შეიცავს გლუტენს. 
მასალა:
- 500 გ ბრიუსელის კომბოსტო
- 2 ცალი ყაბაყი
- 3 ცალი სტაფილო
- 1 ხახვი
- 2 სკ მცენარეული ზეთი
- 2 კბილი ნიორი
- 100-200 მლ ნაღები
- ½ ჩკ ქარის ფხვნილი (Curry)
- მსხვილად დაფქული წიწაკა, მარილი
- მწვანილი გემოვნებით
მომზადება: ბრიუსელის კომბოსტოს გარეთა დამჭკნარი ფოთლები მოაცალეთ და უხეში ძირები მოაჭერით. ჩაყარეთ მდუღარე მარილწყალში და ხარშეთ 6 წუთი. შემდეგ გადაწურეთ, ჩაყარეთ ყინულიან წყალში და დაწურეთ საწურზე. ხახვი, წვრილად დაჭრილი ნიორი და რკალებად დაჭრილი სტაფილო და ყაბაყი მოშუშეთ ზეთში ღრმა ტაფაზე.
ბოსტნეული რომ დარბილდება, დაამატეთ მოხარშული ბრიუსელის კომბოსტო და ყველაფერი ერთად შუშეთ 5 წუთის განმავლობაში. შეკმაზეთ წიწაკით, ქარით და მარილით. დაამატეთ ნაღები, წამოადუღეთ და გემო გაუსინჯეთ. თუ რაიმე აკლია, შეკმაზეთ დამატებით.
მიირთვით ბრიუსელის კომბოსტოსა და ყაბაყის სალათი ცხელ-ცხელი მოხარშულ კანგაუცლელ ბრინჯთან, კარტოფილთან ან/და ხორცეულთან ერთად.
მიირთვით გემრიელად!
