შემწვარი ბადრიჯანი მწვანილით
ძალიან გემრიელი და მარტივი ვეგეტარული, საზაფხულო კერძი „შემწვარი ბადრიჯანი მწვანილით“ შეგიძლიათ თბილი ან ცივი მიირთვათ. დასაშვებია მარხულებისა და ვეგანებისათვისაც.
მასალა:
- 4-5 მოზრდილი ბადრიჯანი
- 1-2 თავი ხახვი
- თითო კონა ქინძი და ოხრახუში
- 1-2 კბილი ნიორი
- 2 სკ ღვინის ძმარი
- მარილი
- ნედლი მწარე წიწაკა (სურვილით)
- ზეთი ბადრიჯნის შესაწვავად
მომზადება:
ბადრიჯანი შესაწვავად მოამზადეთ ისე, როგორც ნიგვზიანი ბადრიჯნის რეცეპტშია აღწერილი. ბადრიჯანს მარილს რომ დააყრით, მოამზადეთ ხახვი და მწვანილი: ქინძი და ოხრახუში დაჭერით ერთად, ისე, რომ ერთმანეთს შეერიოს. ხახვი დაჭერიღ ნახევარწრეებად. წიწაკა დაჭერით რგოლებად, ნივრის კბილები გაჭერით ორად, ან გაჭყლითეთ.
შემდეგ დაიწყეთ ბადრიჯნის შეწვა ზომიერ ცეცხლზე. ესეც დაწვრილებითაა აღწერილი ნიგვზიანი ბადრიჯნის რეცეპტში. პირველი ორი ან სამი ნაჭერი რომ შეიწვება, ამოიღეთ ტაფიდან და ერთმანეთის გვერდით დაალაგეთ ფართო თეფშზე. მაშინვე, ცხელს ზედაპირზე წაუსვით გაჭრილი ნიორი ან ცოტაოდენი გაჭყლეტილი ნიორი წააცხეთ (თუ ნიორი გიყვართ). შემდეგ ფუნჯით მოაწვეთეთ ცოტა ძმარი, მოაწყვეთ ხახვის რგოლები და მოაყარეთ მწვანილი და წიწაკის რგოლები (თუ გსურთ).
შემდეგი შემწვარი ნაჭრები უკვე სეკმაზულ ნაჭრებს ზევიდან დააწყვეთ და იგივე გაიმეორეთ. ასე გააგრძელეთ, ვიდრე ბადრიჯანი დაგიმთავრდებათ.
მიირთვით თბილი ან ცივი.
ასე შემწვარი ბადრიჯანი კარგად ინახება მაცივარში რამოდენიმე დღე. უგემრიელესია ცივიც.
მიირთვით გემრიელად! 
