გაყინული ხაჭაპური
ყველასთვის საყვარელი ხაჭაპურის მომზადება შრომატევადი საქმიანობაა და გარკვეულ დროს საჭიროებს. ალბათ ბევრ თქვენგანს, ისევე როგორც მეც, არა ერთხელ გადაუფიქრებია ხაჭაპურის მომზადება უდროობის გამო. მე ასეთი გამოსავალი მოვძებნე: მოვამზადებ მომცრო ზომის ხაჭაპურებს, დაახლოებით ერთი ულუფის ზომით, ვყინავ და ვინახავ საყინულეში.
ასე გაყინულ ხაჭაპურს კარგად გამოიყენებთ მოულოდნელი სტუმრიანობის დროს, სკოლიდან მოსული ბავშვის დასაპურებლად ან ოჯახის წევრების გასამასპინძლებლად. საყინულედან გამოღების შემდეგ ხაჭაპურს დადნობა არ სჭირდება, შედებთ ღუმელში და ნახევარ საათში მზად არის. და რაც მთავარია, ისეთივე გემრიელია, როგორც ახლად მომზადებული!
მოამზადეთ, გაყინეთ, გამოაცხვეთ და ისიამოვნეთ!
მასალა:
- 1 კგ ფქვილი
- 3 ჩკ მშრალი საფუარი
- 4 სკ მცენარეული ზეთი
- 2 ჩკ მარილი
- 1 სკ შაქარი
- 600-700 მლ სითხე (რძე და წყალი შერეული)
- 1 კგ ყველი
- 1 კვერცხი
მომზადება:
მოამზადეთ ცომი და ყველი ისე, როგორც აღწერილია ხაჭაპურის რეცეპტში.
ცომი და ყველი გაყავით 10-12 ნაწილად, თუ პატარა ხაჭაპურების მომზადებას აპირებთ. გაითვალისწინეთ თქვენი საყინულეს ზომები და რამდენი თავისუფალი ადგილი გაქვთ შიგნით. მოამზადეთ ხაჭაპურები ამავე რეცეპტის მიხედვით და ზედაპირები რამოდენიმე ადგილას ჩაუჩხვლიტეთ.
პლასტმასის ყუთში ჩაფინეთ ცელოფანი და ჩააწყვეთ მომზადებული ხაჭაპურები. ფენებს შორის ცელოფანი დაუფინეთ. დაახურეთ სახურავი და საყინულეში შეინახეთ.
გამოაცხვეთ წინასწარი დადნობის გარეშე 200-220 გრადუსზე დაახლოებით 30 წუთი.
მიირთვით გემრიელად! 
