let us cook

საქართველოში ყველასათვის საყვარელი საუზმეული – ნიგვზიანი ბადრიჯანი ჩემი სხვადასხვა ეროვნების მეგობრებს შორისაც ერთ ერთი ყველაზე პოპულარული კერძია. ერთ მექსიკელ მეგობარს (მამრობითი სქესის) ისე მოეწონა, რომ მთხოვა, მომზადება მესწავლებინა. რა საკვირველია, ჩავუტარე გაკვეთილი!  :) ძალიან ყურადღებით ადევნებდა თვალს მომზადების პროცესს და ხელიც წამახმარა. მექსიკაში უკან დაბრუნებისას სუნელებიც გავატანე. მას შემდეგ რამოდენიმე წელი გავიდა. თურმე ეს პიროვნება მექსიკაში წარმატებულად ამზადებს ნიგვზიან ბადრიჯანს თავისი მეგობრების გასამასპინძლებლად. პეიოდულად ბერლინში ჩამოდის ხოლმე მივლინებით. მეც აუცილებლად ვახვედრებ ნიგვზიან ბადრიჯანს. ხუმრობს ხოლმე – ბერლინში სპეციალურად ბადრიჯნის საჭმელად ჩამოვდივარო. წასვლისას „ბადრიჯნის შემდეგ პარტიმდე“ (Auberginen party) გვემშვიდობება ხოლმე  :).

მინდა ეს რეცეპტი თქვენც გაგიზიაროთ. გამოცდილი დიასახლისებისათვის ალბათ კაგად ნაცნობი რეცეპტია, მაგრამ ახალბედა და დამწყებ კულინარებს საფეხურებრივად აღწერილი მომზადების წესი დაეხმარებათ გემრიელი კერძის მომზადებაში.

მასალა:

• 1 კგ ბადრიჯანი
• ზეთი შესაწვავად
• 200 გ დაფქული (გატარებული) ნიგოზი
• 1 ჩკ დაფქული ქინძი
• 1 ჩკ ხმელი სუნელი
• 1,5 ჩკ ხავერდა (ყვითელი ყვავილი)
• მარილი და დაფქული წიწაკა გემოვნებით
• ნიორი 1-2 კბილი
• 1 სკ ძმარი
• პატარა კონა ქინძი
• ანადუღარი და გაცივებული წყალი საჭიროების მიხედვით

მომზადება:

ბადრიჯანი:

ქორფა, საშუალო ზომის ბადრიჯნები გარეცხეთ, ყუნწები მოაჭერით და დაჭერით თხელ ჰორიზინტალურ ნაჭრებად.

თითოეულ ნაჭერს მოაყარეთ მარილი და დატოვეთ 15-20 წუთი. შემდეგ რამოდენიმე ნაჭერი ერთად აიღეთ, ხელის მსუბუქი მოჭერით ზედმეტი სითხე (და მომწარო ნივთიერებები) გამოდევნეთ.

ტაფაზე გააცხელეთ ზეთი ზომიერად, დააწყვეთ ბადრიჯნის ნაჭრები და ზომიერ ცეცხლზე შეწვით ორივე მხრიდან.

გაითვალისწინეთ, რომ მაღალ ცეცხლზე ბადრიჯანი შეიძლება უცებ დაგეწვათ და შიგნიდან უმი დარჩეს, ამიტომ ძალიან მნიშვნელოვანია სწორი ტემპერატურის შერჩევა. ნაჭრები გარედან უნდა ზომიერად შეიბრაწოს და შიგნიდან ჩარბილდეს.

თუ გნებავთ შემწვარი ბადრიჯანი ნაკლებკალორიული გამოგივიდეთ, ტაფიდან ამოღების შემდეგ ქაღალდის ხელსახოცზე დააწყვეთ, რომ ქაღალდმა ზედმეტი ცხიმი გამოიწოვოს.

ნიგვზის საკმაზი:

საკმაზის მომზადების წესს ბაჟეს რეცეპტშიც ნახავთ.

დაფქულ ნიგოზს შეურიეთ სუნელები (ნედლი ქინძის გარდა), მარილი, ნიორი, ძმარი, 1 სკ წყალი და ხელით მოზილეთ ისე, რომ მშრალი მასალა დასველდეს. ასე გააგრძელეთ დაახლოებით ხუთი წუთი. მალე შეატყობთ, რომ ხელის მოჭერისას ნიგოზს ზეთი გამოეყოფა. გააკეთეთ ნიგვზიანი მასის პატარა გუნდები, მუჭის მოჭერით გამოადინეთ ზეთი და ჭიქაში ჩაწურეთ.

ახალი გამოწურული ზეთი ცოტა მღვრივეა, ცოტა ხანში ნიგვზის ნაწილები დაილექება და კამკამა გახდება. ასე გამოწურული ზეთი ძალიან გემრიელია სალათებში. თუ მოგრჩებათ, გადაინახეთ.

შემდეგ ნიგოზს დაასხით რამოდენიმე სადილის კოვზი წყალი და მთლიანად შეურიეთ ნიგოზს. ნელ-ნელა ამატეთ წყალი და თან ურიეთ ფაფისებური მასის მიღებამდე. ბოლოს შეურიეთ წვრილად დაჭრილი ქინძიც. გემო გასინჯეთ და თუ რაიმე აკლია, დაუმატეთ.

მიღებული საკმაზი წაუსვით ბადრიჯნის თითოეულ ნაჭერს და ზევიდანაც გადაუსვით.

მოაწვეთეთ ნიგვზიდან გამოხდილი ზეთი.

მიირთვით გემრიელად!